એશિયન બેડમિન્ટન ચેમ્પિયનશિપ: ચીની ખેલાડીને હરાવી સેમિફાઈનલમાં પીવી સિંધુની એન્ટ્રી, એક મેડલ તો હવે પાક્કો

ઓલિમ્પિક મેડલિસ્ટ પીવી સિંધુ એશિયન બેડમિન્ટન ચેમ્પિયનશિપની મહિલા સિંગલ્સની સેમિફાઈનલમાં પહોંચી ગઈ છે. તેણે એક રોમાંચક મેચમાં ચીનની હી બિંગ જિયાઓને 21-9, 13-21, 21-19થી હરાવી હતી. આ જીતની સાથે સિંધુએ ટૂર્નામેન્ટમાં એક મેડલ પાક્કો કરી લીધો છે. એશિયન બેડમિન્ટન ચેમ્પિયનશિપ ટૂર્નામેન્ટ લગભગ 2 વર્ષ પછી ફરીથી આયોજિત થઈ રહી છે. કોરોનાને કારણે 2 વર્ષ સુધી આને રદ કરાઈ હતી.

વર્લ્ડ રેન્કિંગમાં 7મા અને આ ટૂર્નામેન્ટમાં ચોથા નંબર પર રહેલી સિંધુએ 2014મા ગિમચિયોનમાં રમાયેલી આ ટૂર્નામેન્ટમાં બ્રોન્ઝ મેડલ જીત્યો હતો. સિંધુએ પાંચમા નંબર પર સ્થિત ચીની ખેલાડીને હરાવી આ સિદ્ધિ મેળવી હતી.

બિંગ સાથેની મેચની હાઈલાઈટ્સ
પહેલા સેટમાં 11-2ની લીડ લીધા પછી બિંગને કમબેક કરવાની તક જ સિંધુએ આપી નહોતી. ત્યારપછી બીજા સેટમાં ચીનની બિંગ જિયાઓએ કમબેક કર્યું અને પહેલા 6-4 અને પછી 11-10થી લીડ મેળવી લીધી હતી. બ્રેક પછી ચીની ખેલાડીએ 19-12ની લીડ બનાવી અને 13-21થી જીતી લીધી હતી.

ત્રીજા સેટમાં શરૂઆતમાં સ્કોર 2-2ની બરાબરી પર હતો. ત્યારપછી સિંધુએ 11-5ની લીડ લીધી હતી. જોકે બાઉન્સ બેક કરીને બિંગે 18-16 સુધી ગેમ લાવી દીધી હતી. પરંતુ છેવટે સિંધુએ શાનદાર ગેમપ્લાન સાથે 21-19થી આ મેચ પોતાને નામ કરી લીધી હતી.