કોરોનાને હરાવનાર ચીનની વાત: ભારત સહિત સમગ્ર વિશ્વમાં કોરોનાની બીજી આંધી આવી છે ત્યારે ચીનમાં સબ સલામત છે, જીવન થાળે પડી ગયું છે

ભારત સહિત વિશ્વભરના અનેક દેશો કોરોના વાઈરસની બીજી આંધી (લહેર)માં ફસાઈ ગયા છે. ભારતમાં દરરોજ એક લાખથી વધારે કોરોનાના દર્દીઓ મળી રહ્યા છે. દેશમાં કોરોનાના કેસની સંખ્યાનો રોજે રોજ નવો રેકોર્ડ સ્થાપિત થઈ રહ્યો છે. ગઈકાલે ભારતમાં કોરોનાનો 1,31,893 કેસ આવ્યા જે અત્યાર સુધીમાં એક જ દિવસમાં આવેલા સૌથી વધારે કેસ છે. આ ઉપરાંત ગઈકાલે 802 લોકોએ કોરોનાને લીધે જીવ ગુમાવ્યા છે.

પણ હવે પ્રશ્ન એ થાય છે કે જે દેશ કોરોના વાઈરસનું જન્મદાતા છે અને જેણે સમગ્ર દુનિયાને આ મહામારીના ખપ્પરમાં હોમી દીધી છે તે ચીનમાં સ્થિતિ બિલકુલ સામાન્ય કેમ છે…ગઈકાલે સમગ્ર વિશ્વમાં કોરોના સંક્રમિત નવા દર્દીની સંખ્યા 7,39,311 હતી અને 13,913 લોકોએ જીવ ગુમાવ્યા હતા. પણ આશ્ચર્યની વાત એ છે કે ચીનમાં ગઈકાલે ફક્ત 24 જેટલા જ નવા કેસ મળી આવ્યા હતા.જ્યારે કોરોનાથી એક પણ વ્યક્તિનું મૃત્યુ થયું ન હતું.

ચીનમાં સ્થાનિક લોકોએ 23 માર્ચ,2021ના રોજ આ રીતે વેક્સિનેશનની પ્રક્રિયામાં ભાગ લીધો હતો.

ચીનમાં કોરોના વાઈરસ મળી આવતાની સાથે જ ચીને યુદ્ધના ધોરણે પોતાની તમામ વ્યવસ્થાને કામે લગાડી દીધી હતી. આ માટે તેને મોટાપાયે હોસ્પિટલ, ઈન્ફ્રાસ્ટ્રક્ચર, દવાઓ, નિષ્ણાતોની ટીમ અને તાલીમ પામેલા મેડિકલ સ્ટાફને કામે લગાડી દીધા હતા. બીજી બાજુ આર્થિક મોરચે થતા નુકસાનની બિલકુલ ચિંતા કર્યાં વગર લોકડાઉન, કન્ટેઈનમેન્ટ ઝોન તથા સંક્રમિત લોકોની શોધખોળ તથા ફરજિયાત સારવાર માટે એક અભિયાન હાથ ધરેલું. જે પ્રકારે અહેવાલ આવી રહ્યા છે તેને જોતા ચીનની કોરોના સામેની લડાઈમાં મેળવેલી જીતને આ મુદ્દાઓથી સમજી શકાય છે.

(ફાઈલ ફોટો)