ફ્રાંસમાં કટ્ટરવાદ સામે કાયદો: મસ્જિદો અને મદરેસાઓ પર સરકાર વધુ ચાપતી નજર રાખી શકશે; બળજબરીપૂર્વક અને એક કરતા વધુ લગ્ન સામે કડક કાયદો બનશે

ફ્રાંસના રાષ્ટ્રપતિ રાષ્ટ્રપતિ ઈમેન્યુઅલ મેક્રોન (ફાઈલ ફોટો)

ફ્રાંસની સંસદના નિચલા ગૃહમાં મંગળવારે ઈસ્લામીક કટ્ટરવાદ સામે એક વિધેયક રજૂ કરવામાં આવ્યું છે. આ વિધેયકને જો કાયદાનું સ્વરૂપ મળશે તો ફ્રાંસમાં મસ્જિદો અને મદરેસાઓ પર સરકાર વધુ અસરકારક રીતે ચાપતી નજર રાખી શકશે. આ સાથે બહુ વિવાહ(polygamy) અને બળજબરીપૂર્વક લગ્ન (Forced Marriage)સામે કાયદો વધુ કડક બનશે.

રાષ્ટ્રપતિ ઈમેન્યુઅલ મેક્રોને કહ્યું છે કે લિંગ સમાનતા અને ધર્મનિરપેક્ષતા જેવા ફ્રાંસના મૂલ્યોનું રક્ષણ કરવું ખૂબ જરૂરી છે. આ બાબતને ધ્યાનમાં રાખી આ પ્રકારના કાયદા દેશ હિતમાં છે. બીજી બાજુ ફ્રાંસમાં રહેતા મુસ્લિમોનું કહેવું છે કે આ કાયદા તેમની ધાર્મિક સ્વતંત્રતાને મર્યાદિત કરશે તેમ જ આ કાયદા મારફતે તેમને નિશાન બનાવવામાં આવશે. તેમણે કહ્યું કે ફ્રાંસ પાસે અગાઉથી જ આતંકવાદી હિંસા સામે લડવા માટે પર્યાપ્ત કાયદો છે. માટે નવા વિધેયકની કોઈ જ જરૂર નથી.

આગામી વર્ષે યોજાનાર રાષ્ટ્રપતિ ચૂંટણીઓ પર નજર
ટીકાકારોનું કહેવું છે કે ફ્રાંસમાં આગામી વર્ષે યોજાનાર રાષ્ટ્રપતિ ચૂંટણીને ધ્યાનમાં રાખી આ વિધેયક રજૂ કરવામાં આવી રહ્યું છે. આ વિધેયક મારફતે રુઢિવાદી અને દક્ષિણપંથી મતદાતાઓને આકર્ષવા માટે આ પ્રયત્ન કરવામાં આવી રહ્યા છે. અલબત નેશનલ એસેમ્બલીમાં મેક્રોનની પાર્ટીને બહુમત છે, માટે આ વિધેયક સરળતાથી પસાર થઈ જશે. સેનેટમાંથી પણ આ વિધેયકને મંજૂરી મળે તેવી આશા છે.

ગયા વર્ષે શાળાની બહાર શિક્ષકનું માથુ કાપવામાં આવ્યું હતું
ઓક્ટોબર,2020માં વિદ્યાર્થીઓને પેગંબ્ર મોહમ્મદનું કાર્ટૂન દેખાડવા બદલ એક હુમલાખોરે શિક્ષકનું માથુ કાપી નાંખ્યું હતું. આ ઘટના રાજધાની પેરિસથી 30 કિલોમીટર દૂર કોનફ્લેન્સ સેન્ટ-હોનોરિનની એક મીડલ સ્કૂલની બહાર સર્જાઈ હતી. જોકે, પોલીસે આરોપીને ઠાર કર્યો હતો.
આ અગાઉ પણ વર્ષ 2015માં વિવાદાસ્પદ વ્યંગ્ય સામયિક ‘શાર્લી એબ્દો’ અને પેરિસમાં એક યહુદી સુપર માર્કેટ પર આતંકવાદી હુમલા થયા હતા.